Një shumë e madhe valute dhe disa banesa u vendosën nën sekuestro nga prokuroria e Lezhës për shkak të burimit të dyshimtë. Bëhet fjalë për 5.2 milionë euro që kishin ardhur në llogarinë e të moshuarit Pjetër Voci dhe një gruaje me emrin Shqipe Palaj. Ato ishin dërguar nga një shtetas suedez dhe nga motra e Shqipe Palit që jeton në Suedi. AbcNews raporton se ndër të tjera, Shqipe Pali kishte terhequr këto para për të blerë apartamente në Lezhë e Tiranë. Dy prej banesave rezulton t’ia ketë shitur deputeti dhe n/kryetari i PD, Edi Paloka.
Pavarësisht se këto transferta kanë nisur në 2013, ato nisin dhe bëhen në vlera shumë të mëdha gjatë 2018-ës. Vetëm në periudhën Korrik-Gusht, llogaria e Shqipe Palit është kredituar me 2 milionë euro, të cilat janë dërguar nga një shtetas suedez, emri i të cilit nuk është bërë publik.
Shuma të mëdha parash janë dërguar edhe në llogarinë e 83 vjeçarit Pjeter Voci, ku rezulton se jenë kredituar rreth 3 milionë euro në janar të këtij viti, raporton AbcNews. Paratë kanë nisur të tërhiqen në shuma të mëdha nga muaji shtator i vitit 2018 dhe ka vijuar deri në fillim të janarit dhe me to janë blerë apartamente në Shëngjin, Lezhë e Tiranë.
Nga hetimet e kryera rezulton se dy nga banesat që janë blerë nga znj.Palaj kanë qenë në pronësi të nënkryetarit të Partisë Demokratike Edi Paloka përkatësisht në vlerat e 8.7 milionë lekë dhe 70 mijë euro.
Hetimet tashmë janë shtrirë edhe më shumë, duke analizuar edhe veprimet e personave që janë përfshirë në këto shitblerje dhe pozicionin e tyre. Burime nga Prokuroria e Lezhës ka bërë me dije se janë kërkuar dëshmitë dy shtetasve në llogaritë e të cilëve erdhën shumat e parave, ndërsa bëhet e ditur se nëpërmjet një letërporosie po kërkohet informacion edhe për dërguesin e parave.
Burime: opinion.al
