Presidenti rus, Vladimir Putin ka akuzuar Shtetet e Bashkuara dhe aleatët e saj për destabilizimin e Ballkanit duke “pohuar rolin e tyre dominues” në rajon.
Presidenti rus kritikoi atë që ai e përshkroi si përpjekje të qëllimshme për të rritur ndikimin perëndimor në një pjesë të botës, për të cilën Moska ka kohë që synon përfshirjen në orbitën e vet si në rastin e Maqedonisë.
“Politika e Shteteve të Bashkuara dhe disa vendeve të tjera perëndimore në Ballkan, të cilët kërkojnë të mbrojnë dominimin e tyre në rajon, ka qenë një faktor serioz destabilizues“, tha ai për gazetën serbe, Večernje novosti nga Kremlini.
“Kjo do të rrisë më tej mosbesimin dhe tensionet në Evropë, në vend që të përmirësojë stabilitetin”, shtoi.
Komentet e kreut rus, vijnë përpara një vizite në Beograd, aleati më i vendosur i Moskës në rajon. Ai shprehu keqardhje për politikën “shkatërruese” të zgjerimit të NATO-s në gadishullin Ballkanik të paqëndrueshëm historikisht.
“Ne gjithashtu kemi thënë në mënyrë të përsëritur se kemi parë politikën e zgjerimit të NATO-s si një mbetje të Luftës së Ftohtë dhe një strategji të gabuar dhe destruktive ushtarake dhe politike,” tha ai për gazetat.
Javën e kaluar, deputetët maqedonas miratuan një marrëveshje historike me Greqinë për çështjen e emrit, çka do t’i hapë dyert për anëtarësimin e këtij shteti në NATO.
Marrëveshja për ndryshimin e emrit, e arritur pas pothuajse 30 vitesh mosmarrëveshjeje me Greqinë, pritet të ratifikohet nga ligjvënësit në Athinë brenda disa ditëve.
