Mënyra më e mirë për të mos shtuar kile gjatë periudhës së festave? E thjeshtë. Mendohu përpara se të sulesh me pjatë në dorë në tavolinën që ka një orë që ta bën me sy. E dimë që është e vështirë të përmbahesh, por… prit po ta shpjegojmë më mirë.
Është gjithmonë e njëjta histori. Në ditët e para të janarit e gjejmë veten duke bërë llogaritë me peshoren. Po nga vijnë gjithë këto kile të tepërta? Deri para një jave as që ishin fare. Mos ka diçka që nuk shkon me peshoren?
Apo ndoshta e ke tepruar pak me ushqimin në periudhën e festave? Le të mbetemi tek hipoteza a dytë dhe imagjinojmë se me pak ndershmëri të gjithë mund ta gjejnë se kush e ka fajin.
Po sikur ta kishim menduar më parë? Po sikur gjatë javës më të babëzitur të vitit të mos i kishim lënë të lira instinktet tona bazë? (instinktet ushqyese e kemi fjalën).
Dikush do thoshte që nëse do kishim vepruar kështu, nuk do ishim zbavitur aq shumë. E gabuar. Sepse me paaaaak fare dhimbje mund të limitohen dëmet që të shkaktojnë ditët e festave. E në të njëjtën kohë mundesh sërish të zbavitesh e të shijosh specialitetet e kuzhinës së festave dhe të mos i shikosh me frikë pantallonat që po pëlcasin. Ja se si
1) Kujdes me porcionet
Ha atë që të pëlqen, në fund të fundit është një periudhë veçanërisht e pasur me ushqime të shijshme, por mos e ekzagjero me porcionet. Madje përpiqu që të marrësh pak nga të gjitha sa ofron tavolina, por në sasi të limituara.
2) Mos lër ëmbëlsira vërdallë
Mos lër asgjë para syve, sidomos ato ëmbëlsirat e vogla e të shijshme që hahen me një kafshatë e të shijojnë aq shumë saaaa. Ok e tepruam. Na duket se po ju shtyjmë më keq në mëkat. Kështu pra, mos lini ëmbëlsira vërdallë.
3) Mëso të thuash jo
Ki gjithmonë një arsye të besueshme për këdo që nuk kënaqej me një “jo” të thjeshtë por kërkon të dijë përse-në. Sepse… sepse jam alergjike nga tartat me salmon të zhytur në majonezë. E thamë sa për t’ju dhënë një shembull e jo që t’ju shkojë goja lëng.
4) Shko në festë me diçka në stomak
Një mollë ose një frut çfarëdo, diçka që të të japë disi një ndjenjë të lehtë ngopjeje që të ndihmon që të kontrollosh porcionet dhe t’u shpëtosh tundimeve.
5) Mos e ekzagjero me alkoolin
Jo (vetëm) sepse edhe alkooli të shëndosh, por sepse i bën më të forta tundimet e gojës. Një mente të ndihmon të rezistosh. Nëse e ekzagjeron me pijen, rri e qetë. Thjesht do të shkosh në shtrat me barkun shumë më të fryrë nga sa e kishe programuar. Këtë do?
6) Seleksiono
Ose të paktën përpiqu që të lësh mënjanë ushqimet e rënda kur përgatit menunë e festës.
7) Lëviz edhe gjatë festave
Përpiqu që edhe gjatë ditëve kur je pushime të jesh në lëvizje. Dil nga shtëpia, shko të bësh një shëtitje, shko tako një mikeshë… me pak fjalë mos rri në shtëpi me pizhame e pandofla duke numëruar minutat që të ndajnë nga vakti tjetër.
8) Mos e ekzagjero
Me vetëkontrollin e kemi fjalën. Gjithsesi (këtu po tregohemi vërtet dorëlëshuar) kjo është dhe ngelet një periudhë festash dhe argëtimesh. Ne thjesht po përpiqemi që të shmangim dëmet e rënda, por jo t’u këshillojnë që të filloni një dietë dobësuese. Pikërisht në këtë periudhë? Nuk do t’ia vlente.
9) Pak palestër
Dhuroji vetes (ose sugjeroi dikujt që të të dhurojë) një abonim në palestër. Është mënyra më e mirë për të vënë theksin tek festat dhe për të filluar seriozisht, pasi kjo periudhë të kalojë, që të mbahesh në formë.
