Zëvendëskryeministri i Italisë, Matteo Salvini, u zotua të revolucionojë Bashkimin Europian, duke paralajmëruar ashpër Brukselin, me pretendimin se euroskeptikët e vërtetë të Europës janë ata që qeverisin bllokun në këtë moment.
“Jam i lumtur sepse Italia është motori i Rilindjes europiane. Dhe nëse arrijmë të japim atë që kemi përcaktuar, ne do të provojmë se armiqtë e Europës, euroskeptikët e vërtetë, janë ata që kanë qeverisur keq shumë vite në Europë. Europa duhet të rizbulojë vizionin e saj origjinal, misionin e saj fillestar për të bërë më pak gjëra dhe t’i bëjë ato mirë, duke garantuar punësim të plotë, siç është përcaktuar në Traktatin e Mastrihtit, duke garantuar mirëqenien ekonomike dhe sociale të popullit europian”, tha Salvini.
Ai shtoi se “do të sfidoj këdo që është duke dëgjuar tani, nga ata që më duan ose jo, të më thonë se kjo burokraci europiane po garanton mirëqenien ekonomike dhe sociale dhe punësimin e plotë. Ne jemi duke punuar për një Europë që shikon përpara, që është më e lirë dhe më respektuese për realitetet kombëtare individuale”.
Salvini, udhëheqës i partisë së skajit të djathtë, “Lega” në Itali, u zotua të formojë një aleancë të re të partive të krahut të djathtë populist të udhëhequr nga “Lega Nord” në Parlamentin Europian, përpara zgjedhjeve të majit 2019.
Sipas mediave italiane, zëvendëskryeministri mori mbështetje të gjerë kur fliste për Brukselin dhe dëshirën e tij për të krijuar një aleancë ndërshtetërore të partive populiste në zemër të komunitetit europian. “Ne do të japim gjakun tonë për një komunitet të ri europian. Ne po bëjmë gjithçka për ta bërë Italinë të madhe përsëri”, tha Salvini. Qarqet diplomatike të Brukselit frikësohen se Europa mund të “ndryshojë për keq” për shkak të strukturave të reja të pushtetit pas zgjedhjeve europiane.
