Analisti Fatos Lubonja teksa u ndal tek denoncimi i Partisë Demokratike në lidhje me pretendimet e saj se si ndryshoi projekti i Unazës së Re për të favorizuar biznesmenin Edmond Bego për të ndërtuar një kompleks luksoz, theksoi se qeveria po punon për një pakicë oligarkësh.
Lubonja, i cili është bërë pjesë e emisionit ‘Të Paekspozuarit’ në ‘News24’ përmes një lidhje skype tha se të gjitha këto ndërtime bëhen me paratë e drogës.
Po ashtu ai theksoi se PD ka përmendur përciptas si pjesë të skandalit me Unazën, emrin e biznesmenit Bashkim Ulaj, që sipas tij ka qenë përfitues tenderash edhe në kohën kur qeveriste Berisha.
“Dëgjova një skandal të ri që ka nxjerrë opozita, që lidhet me emrin e Edmond Begos.
Gjeja e parë është një provë më tepër e asaj që ne kemi një qeveri që punon për një pakicë oligarkësh dhe kriminelësh kundër shumicës. Kjo është provë skandaloze.
E dyta që do thoja unë është se ka një problem tjetër në fazën ku ka hyrë ky sistem oligarko-kriminale.
Ne flisnim për këta oligarkë kriminal të televizioneve, ku mund të hyjë dhe ky Ulaj. Tani ka shpërthyer një fazë ku nevoja për pushtet dhe kriza për pushtet, ka shkuar tek prova e krimit, siç është ky Bego. Këto janë para droge, pasi më thoni mua se si mund të kesh aq pasuri.
Nëse mendohet se këta njerëz po na bëjnë ca pallate, them se po na shkatërrojnë gjithçka. Shteti duhet ti çojë në burg dhe jo t’u japë lejë ndërtimi.
Se shoh më të vogël se skandali Ulaj. Është një shtet oligark. Ky ka qenë si më i ligjëruar, edhe pse thonë se ky ka bandat e tij nga mbrapa. Sapo e nisi ajo zonja (Tabaku) i vuri emrin skandali ‘Bego’.
Dhe kemi një përmendje të Uljat, sa për të larë gojën, pasi ka marrë tendera gjatë qeverisjes së PD. Ka marrë tendera nga Berisha.
Këtu ka disa probleme, që unë po i shtroj. Nëse do më thuash se cili është problemi nr 1; është problemi i një opozite që duhet të shkëputet qartë nga ky sistem.
I dyti është; paraja e krimit që ka kapur ekonominë siç është ky skandal”, tha Lubonja.
