Arbër Dervishaj, i riu që gjatë dialogut të studentëve në Vlorë me Kryeministrin Rama, prishi qetësinë në sallë duke fyer Kryeministrin, rezultoi të jetë një aktivist i partisë “Zgjidhja” të Koço Kokëdhimës.
Pasi mediat zbuluan fotot e të riut nga takimet e tij me Kokëdhimën, ka reaguar vetë ky i fundit përmes një deklarate në faqen zyrtare të partisë në facebook.
Kokëdhima pranon në këtë mënyrë se e ka infiltruar të riun për të prishur dialogun e kryeministrit me studentët. Ai thekson se djali është ndër themeluesit e parë të partisë së tij dhe se është krenar për sjelljen e tij të sotme, sjellje që tejkaloi çdo normë etike.
Reagimi i Kokëdhimës:
“Krenar për Arbër Dervishajn
Arbër Dervishaj, është aktivist i partisë ZGJIDHJA, që në ditët e para të themelimit të saj.
Sot Arbri ishte njëri prej studentëve të shkëlqyer dhe kurajozë të Universitetit të Vlorës që u përballën me kryeministrin në sallën e “Ismail Qemalit”. Ia përplasi në fytyrë kryeministrit atë që mendojnë shumica e shqiptarëve kur i tha: “Je mashtruesi më i madh në këtë vend! Fëmijët të kanë frikë më shumë se gogolin. Shpresoj të mos pushkatohem pas kësaj”.
Jemi krenar për Arbrin, këtë djalosh të sjellshëm, të urtë dhe të zgjuar, por që bëhet shqiponjë përballë armiqve të lirisë dhe të popullit shqiptar. Të rinj si ai i duhen këtij vendi dhe ata do të dinë si t’i rrëzojnë mashtruesit si kryeministri i sotëm.”
