Thellohet skandali me emrat që kanë zaptuar ambjentet e studentëve në mënyrë të paligjshme gjatë qeverisjes PD-LSI. Pas vëllait të ish Presidentit Bujar Nishani, lexo.al ka zbuluar se edhe vëllai i Nasip Naços ka përfituar në shkelje të plotë me ligjin, mensën e studentëve për një periudhë 10 vjeçare.
Mersin Naço, vëllai i ish ministrit të Drejtësisë dhe aktualisht deputet i LSI Nasip Naços, ka përfituar për shfrytëzime biznesi personal ambjentet e ish mensës së Godinës Nr.1 në Rezidencën Studentore Universitare Nr.2.
Nga një konstatim i bërë, vihet re dukshëm një shkelje e rëndë dhe tepër abuzimeve në mënyrën se si kjo kontratë qeraje është lidhur ndërmjet Ministrisë së Ekonomisë, Tregtisë dhe Energjitikës me shoqërinë “KIBA FAXHO”, emri i së cilës është ndryshuar nga “KIBA FAXHO” në “GARDEN PARK” më 20.08.2015 Me anë të një vëzhgimi në faqen zyrtare të QKB, vihet re që regjistrimi i kësaj shoqërie për herë të parë është bërë më datë 4/10/2011, ndërkohë që kontrata e qerasë ku është shpallur fituese shoqëria e shtetasit Mersin Naco, është e datës 10/10/2011.
Pra 6 ditë pas regjistrimit si biznes, shoqëria e shtetasit Mersin Naco përfiton një ambjent të Ministrisë së Ekonomisë, Tregtisë dhe Energjitikës për shfrytëzim me anë të një kontrate 10 vjeçare.
Në foton e mëposhtme mund të shihni gjithë hapësirën që zaptoi vëllai i Naços, ndërsa në të dytën se si hapësira e zaptuar është çliruar tanimë nga Bashkia Tiranë.
