Politika po tenton të ndërhyjë në protestën e studentëve të cilët prej katër ditësh kanë artikuluar në mënyrë të qartë mospërfshirjen e politikës në kauzën e tyre.
Në media janë publikuar foto të të rinjve të FRESSH e FRPD si për të thënë se protestën po e udhëheqin njerëz të futur nga politika. Ndërkaq, studentët shprehen të shqetësuar për këto ndërhyrje duke pohuar se personazhe të forumeve respektive janë ata që po mundohen të prishin protestën.
Madje, ata thonë se ishin aktivistët e LRI ata që qëlluan me vezë drejt ministrisë së Arsimit.
“Sot kanë qenë disa nga FRESSH por ka pasur kundërshtime nga studentët dhe i kanë larguar. Ditën e djeshme dhe pardjeshme kanë qenë dhe të lëvizjes së LRI, ndërkohë që sot në momentin që ministrja Lindita Nikolla ka dalë të takojë studentët kanë qenë ata që e kanë sharë dhe e kanë gjuajtur me vezë. Në momentin që ministrja është futur brenda, ata janë larguar. Sot kërkonin që ministrja të jepte dorëheqjen dhe këta ishin të forumeve partiake, ishte një vajzë e forumit, e cila donte të thyenim xhamat dhe të gjuanim drejt ministrisë por këtë e refuzuan shumica e studentëve”, tha një prej studentëve më aktivë të protestës.
