Në ditën Kombëtare të Pavarësisë së Shqipërisë, selia e Ministrisë së Jashtme Italiane i ka hapur dyert “Shqipërisë Fantastike” të artistit të madh shqiptar Ibrahim Kodra.
Fatos Faslliu: Kemi filluar në Muzeun permanent të Milanos, kemi vazhduar në Galerinë Kombëtare të Maqedonisë, në Durrës, në Milano përsëri, në Breshia dhe do të mbyllet në Lugano me 1-15 dhjetor.
Administratorja e Fondacionit Kodra në Lugano të Zvicrës thekson identitetin shqiptar të piktorit të madh.
Maria Pacolli: Mjeshtri Kodra ka qënë gjthmonë një simbol i miqësisë mes Europës e Shipërisë, duke që ai vetë është pjesë e kulturës europiane. Për ne si adminstratorë të Fondacionit Kodra është mjaft e rëndësishme të jemi sot këtu në Romë në selinë e Ministrisë së Jashtme italiane. Veprat që ekspozojmë sot shfaqin identitetin e tij shqiptar, origjinën e tit, por dhe kulturën si një pjesë integruese e botës europiane.
Italiania, Laura Saplinger, është një koleksioniste private e veprave të artit e lidhur mjaft me mjeshtrin Ibrahim Kodra, jo vetëm si artiste, por dhe për faktin se kur ishte student në Itali, Ibrahim Kodra ka jetuar në familjen e saj, e cila për 5 vite me radhë i garantoi sigurinë ekonomike e qetësinë e nevojshme që i duhet një artisti në hapat e tij të parë.
Saplinger ka në koleksionin e saj rreth 43 vepra të artistit Kodra, njeh mirë çdo pikturë të tij, momentin e historinë e realizimit të tyre.
Sipas saj, “Totem” është piktura më domethënëse.
Laura Saplinger: Kam një lidhje të veçantë shpirtërore e artistike me mjeshtrin Kodra gjë që më ka shtyrë ta mbështes artin e tij e të ekspozoj nëpër botë një pjesë të koleksionit të tij. Vepra më përfaqësuese për artin e Kodrës është padyshim “Totem”, pikturë me të cilën ai ishte mjaft i lidhur. Është një pikturë që shpreh njeriun modern e për të cilin Kodra ishte mjaft largpamës. Pra njeriu modern që po robotizohet, por që ka ruajtur shpirtin e tij njerëzor. Kodra ishte një largpamës i vërtetë.
Ambasadorja shqiptare në Romë, Anila Bitri, shpreh rëndësinë e këtij aktiviteti.
Anila Bitri: Nën ngjyrat dhe simbolet kombëtare, menduam që vendi ku më bukur mund të bashkoheshin, shfaqeshin dhe manifestoheshin të gjithë këto elementë dhe detaje, ishte vetë Ministria e Jashtme italiane.
Mes pikturave të shfaqura spikat “Shqipëria Fantastike” të cilën Ibrahim Kodra e realizoi më vitin 1997, në vitin më të turbullt në historinë e Shqipërisë postkomuniste.
Papa Gjon Pali i II e përkufizoi artin e mjeshtrit Ibrahim Kodra si një mesazh të vërtetë paqeje.
