Presidenti i Ukrainës, Petro Poroshenko, ka firmosur të mërkurën hyrjen në fuqi të ligjit ushtarak, tre ditë pasi flota ruse hapi zjarr dhe arrestoi ekuipazhin e tre anijeve vendase që po lundronin në brigjet e Krimesë. Kreu i Shtetit thotë se ekziston një rrezik real për një luftë me Rusinë, pasi janë shtuar trupat e armatosura dhe tanket ruse në kufirin me Ukrainën. Nga zhvillimet e fundit, presidenti amerikan Donald Trump ka paralajmëruar anulim të një takimi me homologun e tij rus.
Konflikti mes Rusisë dhe Ukrainës tashmë është përshkallëzuar me matjen e forcës ushtarake.
Presidenti ukrainas, Petro Poroshenko ka deklaruar se ka një rrezik që vendi të shkojë drejt një lufte të vërtetë.
Ai shprehet se numri i njësive luftarake ruse në kufirin me Ukrainën është rritur në mënyrë dramatike në orët e fundit, ku prezenca e tankeve ruse është trefishuar.
Në përgjigje të manovrës ushtarake ai firmosi hyrjen në fuqi të ligjit ushtarak.
Përshkallëzimi i situatës erdhi pasi tre ditë më parë pala ruse kapi tre anije ukrainase dhe ekuipazhin e tyre që po lundronin në brigjet e Detit Azov, afër Krimesë.
Pas kësaj, Gjykata ka urdhëruar dënimin me 60 ditë burg për një pjesë të ekuipazhit të akuzuar për tejkalim të ujërave territorialë, ndërsa pjesëtarët e tjerë do të gjykohen këtë të mërkurë.
Por tashmë situata ka kaluar konfliktin mes dy shteteve.
Presidenti amerikan Donald Trump ka paralajmëruar se mund të anulojë takimin me homologun rus, Vladimir Putin, pas zhvillimeve të fundit.
Dy krerët e shteteve pritet të takohen në rrjedhën e samitit G20 që mbahet të premten në Buenos Aires, por Kremlini konfirmoi të mërkurën se nga kolegët amerikanë nuk kanë informacion për një tërheqje të mundshme nga takimi.
Në ditët e fundit, Departamenti Amerikan i Shtetit, por edhe diplomatë europianë, i kanë dënuar veprimet e Kremlinit si një përshkallëzim i rrezikshëm i situatës, dhe kanë paralajmëruar me sanksione të reja kundër Rusisë.
