Një surprizë mjaft e veçantë dhe prekëse i është bërë ditën e sotme kirurgut të vetëm në qytetin e Pukës, Dr.Dodë Bocin me rastin e 65-vjetorit të lindjes.
Kryetari i Bashkisë i këtij qyteti e ka thirrur me “urgjencë” mëngjesin e sotëm kirurgun në sallën e operacionit pasi një prej të afërmve të tij kishte nevojë për një ndërhyrje.
Me të ardhur në sallën e operacionit Boci është përballur me një surprizë të bukur ku të afërm por edhe pacientë të kuruar dhe të shpëtuar prej tij ndodheshin aty me dhurata në duar për t’i uruar 65-vjetorin. Mjaft I emocionuar dhe duke lotuar kirurgu u shpreh falenderues për këtë surprizë ndaj kreut të bashkisë dhe bashkëpunëtorëve të tij.
Ndërsa kryetari i Bashkisë së Pukës Gjon Gjonaj nuk mund të mos e falenderonte kirurgun në emrin e të gjithë komunitetit për punën e tij të palodhur gjithë këto vite.
I pranishëm ishte edhe një ndër pacientët e tij, Gëzim Laçi, i cili e falënderoi Dr.Dodë Bocin për çdo gjë çfarë kishte bërë për të pas plagosjes që kishte pësuar vite më parë ndërsa i tha se i detyrohej dhe vetë jetën.
I prekur dhe mjaft i lumtur për këto nderime, kirurgu Dodë Boci e ka quajtur ditën e sotme si një ndër më të veçantat e jetës teksa premtoj se do të vijonte të kontribuonte për bashkëvendësit e tij sa kohë shëndeti do t’ja lejonte.
