Muzeu i Kastriotëve në Sinë, investim i sapo përfunduar nga Ministria e Kulturës, ka nisur të organizojë aktivitetet e para në kuadër të Vitit Mbarëkombëtar të Skënderbeut.
Shoqata “Çidhna dhe Kastriotët” dhe “Unioni i Krijuesve Dibranë”, në bashkëpunim me Bashkinë Dibër, organizuan një aktivitet kushtuar figurës së Skënderbeut.
Pjesë e këtij aktiviteti u bënë edhe shumë të rinj. Edukimi përmes kulturës tashmë është një ndër mënyrat më të mira për të afruar dhe njohur brezat e rinj me trashëgiminë e pasur kulturore të vendit.
Muzeu i Kastriotëve, monument kulture i kategorisë së II-të, në fshatin Sinë të rrethit të Dibrës, u restaurua pas 27 vjetësh herresë, në kuadër të “Vitit Mbarëkombëtar të Skënderbeut”.
Projekti i hartuar nga specialistët e IMK-së realizoi restaurimin e plotë të objektit, riorganizimin e sistemit të ndriçimit dhe instalimeve elektrike, si dhe sistemimin e territorit përreth godinës.
Gjithashtu, pjesë e rëndësishme e projektit ishte edhe muzealizimi. Janë restauruar dhe ambientet e ekspozimit, si dhe janë riorganizuar tabelat e ekspozimit, në cilësi, dimensione dhe formë.
Restaurimi i muzeut konsistojë dhe në hidroizolimin e tarracës, prishjen e degradimeve, pastrime, lyerje dhe riorganizim e ndriçimit.
Muzeu ka filluar të ndërtohet në vitin 1982 dhe për herë të parë është hapur për publikun në vitin 1985.
