Elmaz Haruni u bë i njohur pasi në korrik të këtij viti u filmua duke sharë dhe fyer efektivët e një partulle të policisë rrugore në qytetin e Gramshit. Policia kishte ndaluar automjetin ku ndodhej kryetari i atëhershëm i degës së PD në Gramsh, pasi drejtuesi ishte në gjendje të dehur. Haruni shpërthen në të shara dhe kërcënime ndaj policëve të cilët nuk e linin atë të dilte nga automjeti i ndaluar. Ai i quajti ata këlyshë të Fatmir Xhafajt, ndërsa i paralajmëronte se do merrej shumë shpejt me ta…
Sot, 5 muaj pasi ai mori “famën”, Elmaz Haruni ka humbur zgjedhjet për një mandat të dytë në krye të demokratëve të Gramshit. Në këto zgjedhje Haruni ka kandiduar përballë Kodhel Çalës i cili edhe ka rezultuar fitues pas numërimit të votave të anëtarëve demokratë që morën pjesë në këtë proces. Çala mori 96 vota kundër 62 të Harunit, ndërsa 3 vota kanë rezultuar të pavlefshme.
Elmaz Haruni, Luçiano Boçi dhe Kodhel Çala, kreu i ri i PD në Gramsh
Elmaz Haruni drejtoi për katër vite degën e PD në Gramsh. Në dy zgjedhjet e fundit në Gramsh, ato lokale të 2015 dhe parlamentaret e 2017, PD ka pësuar rënie të konsiderueshme në vota.
