Kreu demokrat Lulzim Basha është aktualisht nën hetim nga drejtësia amerikane për aferat miliona dollarëshe të lobimit përmes oligarkëve rusë, lidhje këto të zbuluara nga mediat ndërkombëtare.
Por për të qënka e vështirë që të ndahet nga lobet ruse, të cilat hera herës i përdor për të fabrikuar shkrime që nxijnë vendin e tij.
Së fundmi, Basha ka zhvendosur protestën e banorëve të Astirit në Rusi, duke i treguar opinionit publik të Rusisë se si Edi Rama po “përdor policë të pambrojtur e të patrajnuar në protesta, që ata të lëndohen dhe më pas të përdoren politikisht.”
Dje portali informativ Tsarizm.com, që raporton çështje rreth Rusisë dhe ish republikave sovjetike, ritheksonte atë që kemi dëgjuar ditët e fundit nga Basha, se efektivja Ina Nuka ishte një police e pambrojtur dhe e patrajnuar që po përdorej nga pushteti i Edi Ramës.
Mesazhi i Bashës ishte vënë në gojën e një gazetareje me emrin Alice Taylor, që ndër të tjera në shkrimin e saj i bënte thirrje diplomatëve të huaj në Tiranë, të zgjoheshin përpara padrejtësive të qeverisë Rama.
Por si faktohet lidhja e Bashës me propagandën ruse? Portali Tsarizm.com është në pronësi të L.Todd Wood, gazetar me banim në Moskë, emër ky i njohur për shkrimet e tij kundër Shqipërisë në Washington Times, por edhe si njeri i idhur me lobistët rusë.
Lexo.al zbuloi disa kohë me parë lidhjen mes tij dhe Yuri Vanetik, lobist rus dhe anëtar bordi në Tsarizm.com, mik dhe bashkëpunëtor me Nick Muzin, Mike Flynn dhe Kemal Alptekin, që të tre lobistë të Lulzim Bashës.
Së fundmi, mediat amerikane e kanë vënë këtë portal në qendër të sulmeve si një pasqyrë e pështirë e propagandës pro ruse. Shkaku është bërë pikërisht Vanetik, që sipas amerikanëve e përdor portalin për të fabrikuar shkrime në favor të klientëve për të cilët lobon, veprim që drejtësia amerikane e cilëson të paligjshëm.
Portali Tsarizm është i mbushur me shkrime kundër identitetit të shqiptarëve, e në të njejtën kohë me qoka, promovime dhe reklama për klientët e lobistëve si Nick Muzin dhe Yuri Vanetik, dy njerëz që sipas investigimeve kanë shërbyer për Lulzim Bashën.
Së fundmi, ja ku është një tjetër provë që ata e kanë përdorun portalin e L. Tood Wood për t’i bërë jehonë mesazhit të Bashës se efektivja e plagosur rëndë Ina Nuka, ishte thjesht një vajzë e patrajnuar, e përdorur nga pushteti.
