Annegret Kramp Karrenbauer, aleate e afërt e kancelares, Angela Merkel, e njohur ndryshe edhe si AKK, shihet si favorite për të marrë pozicionin e saj në krye të partisë së qendrës së djathtë Unioni Kristian-demokrat (CDU), sipas një sondazhi të publikuar sot.
“Sekretarja e përgjithshme e CDU-së, Annegret Kramp Karrenbauer ka mbështetjen e 38% simpatizantëve të partisë”, sipas këtij sondazhi të publikuar nga televizioni ZDF.
Kramp Karrenbauer është në krye duke lënë pas dy kundërshtarët e saj, ish-kreun e grupit parlamentar të bllokut konservator, Friedrich Merz, që ka 29% dhe ministrin e Shëndetësisë, Jens Spahn, i cili me 6% është konsideruar si i jashtëm në këtë garë.
Delegatët e partisë do të zgjedhin kreun e tyre të radhës, në një konferencë në Hamburg, që do të zhvillohet më 7 dhjetor.
