Një ngjarje e rëndë ka ndodhur ditën e sotme në fshatin Kot të Selenicës ku ka mbetur i vdekur ish kryetari i njësisë administrative të këtij fshati, 63 vjeçari Fatmir Hodaj.
Ndonëse shkaqet janë ende të paqarta ajo që mbetet një detaj i rëndësishëm është se konflikti midis dy personave ndodhi në lokal teksa ishin duke pirë.
Rastet ku vrasjet kanë ndodhur në ambiente të lokalit ku fillimisht janë ulur qetësisht, janë tre të rënda në muajt e fundit.
Kujtojmë vrasjen e bujshme në bllok dhe atë të masakrës së Matit.
Çfarë ndodhi sot:
Sot është vrarë me armë gjahu, kryetari i Njësisë Administrative të fshatit Kotë në Selenicë, Fatmir Hodo.
Autori është identifikuar si Admir Delaj, rreth 43 vjeç, nga fshati Gumenicë dhe është prangosur nga Policia në banesën e tij.
Autori ka qenë duke pirë kafe jashtë lokalit. Është futur brenda dhe ka debatuar me viktimën, më pas kanë dalë të dy jashtë dhe autori e ka qëlluar dy herë.
“Nga hetimet paraprake të kryera dyshohet se ngjarja ka ndodhur nga një konflikt i çastit, pasi dy shtetasit e mësipërm kanë konsumuar pije alkoolike bashkë disa minuta para se të ndodhte ngjarja”, sqaron policia lokale.
Masakra në Mat
Punëtorët e Bashkisë së Matit kishin shkuar për të hapur rrugën në fshatin Shëlli dhe ka patur fillimisht një konflikt verbal me autorin e krimit, Kujtim Koxha, i cili kërkonte të ndaloheshin punimet në tokën e tij.
Disa minuta më vonë, punëtorët e bashkisë kanë shkuar për të drekuar në një lokal të fshatit. Autori ka shkuar në shtëpi ka marrë automatikun dhe ka qëlluar në befasi ndaj tyre, duke lënë 3 të vrarë.
Vrasja në lokalin në Bllok
Mbrëmja e 4 tetorit ku në zonën e ish bllokut mbeti viktimë një person dhe u plagosën 2 të tjerë tronditi kryeqytetin dhe do të mbahet mend gjatë edhe për faktin se pjesë e përplasjes ishte “molla e sherrit” ,këngëtarja Elvana Gjata dhe i njohuri i policisë Ervis Martinaj.
Veç detajeve që vijojnë të dalin dita ditës, kryesori ishte vendodhja. Kjo pasi ishte në një nga pikat më të frekuentuara në Tiranë, atë të një lokali luksoz në zonën e ish bllokut.
Nga video e publikuar vetëm para pak ditësh, shohim se si “pjesëtarët” e grupeve hyn një nga një në lokal dhe për 1 minuta përfundon me viktima.
Përgatiti: AlpeNews.al
