Detaje të reja dalin për ngjarjen e rëndë që ka ndodhur mbrëmjen e sotme në Vlorë.
Sipas informacioneve të para mësohet se në lagjen “Skelë” të Vlorës, janë dëgjuar disa të shtëna me armë, nga të cilat ka mbetur i plagosur një person.
Të njëjtat burime bëjnë me dije se i plagosuri është 18-vjeçari Brikelo Brahimaj, i cili është plagosur në këmbën e djathtë, ndërsa ngjarja ka ndodhur në lulishten e Universitetit “Ismail Qemali”.
I plagosuri është jashtë rrezikut për jetën, ndërsa ende nuk dihen shkaqet dhe rrethanat në të cilat ka ndodhur ngjarja.
Policia ka shoqëruar në polici dy persona, njëri i dyshuar si autori i plagosjes dhe një tjetër që mund të ketë dijeni rreth ngjarjes.
Policia shprehet se ngjarja dyshohet të ketë ndodhur për motive banale.
