Në mesin e rinisë shqiptare të pasurit një cigare hashash në xhepa nuk është më një mit, mit dhe krim bëhet vetëm nëse të kap policia, madje të dënojnë më rëndë se sa të ishe prodhues apo trafikant.
Edhe pse studimet shkencore ndër vite kanë bërë kërkime dhe publikime të ndryshme rreth efekteve të hashashit, të cilat janë më pak të dëmshme ndoshta se të shumë llojeve të duhanit, sërisht hashashi mbetet ilegal.
Për më tepër, le të mësojmë historinë e Fabianit të rrëfyer për “Top Channel”, i cili ka 5 vite që tymos hashash.
Bimën narkotike e ka nisur në moshë minorene dhe prej asaj dite, në xhepin e tij apo të shokëve kishte gjithmonë një cigare hashash.
Madje, e gjenin lehtësisht nëpërmjet njeri-tjetrit, ndonëse ishin ende adoleshentë:
Në moshën 15-vjeçare. Ateherë ka qenë një moshë që njeriu ka kuriozitet shumë, është moshë adoleshente. Jam shtyrë se kam parë dhe isha kurioz ta provoja. Kisha shokë, nuk është se e konsumoja vetëm.”
Sot, në moshën 20-vjeçare, Fabiani ka vendosur të mos jetë më i varur nga hashashi. Këtë vit ka përfunduar një kurs profesional dhe së shpejti dëshiron të vetëpunësohet.
Fabiani shprehet:
Unë kam konsumuar aq shumë, sa që është një moshë që njeriu duhet të kuptojë diçka nga jeta, duhet të fillojë një punë, të ketë një të ardhme.”
Fabiani nuk është i vetëm. Në Shqipëri gjen lehtësisht adoleshentë që konsumojnë bimë narkotike, madje edhe në ambientet e shkollave. Sipas psikologëve, ky fenomen tashmë është prezent. Shkaqet kryesore mbeten veprimet e nxituara të moshës, por edhe mungesa e kontrollit të duhur nga ana e prindërve ndaj fëmijëve.
Ndërsa psikologia thotë:
Çdo individ e ka shumë të vështirë të shkeputet nga varësia e substancave sepse ato ndikojnë drejtpërdrejt në shëndetin mendor. Largimi nga kjo varësi është fakti që duhet të ketë një vullnet shumë të madh individi. Nëse ai do të dojë të largohet, do të kërkojë dhe mënyrën, do të gjejë dhe mënyrën dhe do t’ ia dali.”
