Duke përfituar nga zemërimi i qytetarëve kundrejt klasës politike, lëvizja populiste ANO e miliarderit Andrej Babis, i cilësuar si “Donald Trumpi i Europës”, fitoi ndjeshëm zgjedhjet legjislative në Republikën Çeke.
Kjo pritet t’i sjellë telashe edhe drejtuesve të Bashkimit Europian.
Fakt tjetër i rëndësishëm i këtyre zgjedhjeve që u zhvilluan pa asnjë incident të premten dhe të shtunën, ishte edhe një rritje spektakolare e ekstremit të djathtë SPD, parti kundër BE-së dhe imigracionit si dhe rritja e një tjetër formacioni antisistem, Partia Pirate.
ANO (që në gjuhën çeke do të thotë “Po”), që bëri fushatë për luftën kundër korrupsionit, kundër pritjes së emigrantëve dhe zonës euro, ka marrë 29,7 për qind të votave, që i jep 78 nga 200 vende në Dhomën e Ulët të Parlamentit.
Babis me këtë rezultat është i detyruar të formojë një koalicion, një operacion delikat në një dhomë të ndarë në nëntë parti. Dy prej tyre, ODS-ja (e djathta euroskeptike) dhe KDU-CSL (kristiandemokratët) kanë njoftuar menjëherë se nuk do të negociojnë me Babis.
ANO ndiqet nga tre parti që kanë marrë gati rezultate identike, ODS-ja (e djathtë) 11,3 për qind, Partia Pirate 10,8 për qind dhe SPD-ja (ekstremi i djathtë) 10,7 për qind.
