Policia e Krujës zhvilloi dje një operacion për të mbrojtur jetën dhe shëndetin e banorëve, pas ankesave të tyre të vazhdueshme në lidhje me ndotjen mjedisore që shkaktonin furrat e gëlqereve.
Pas verifikimit në terren, nëntë persona u vunë në pranga si shkaktarë të kësaj katastrofe mjedisore. Mësohet se ishin banorët e zonës, që denonconin rastet e njëpasnjëshme të ndotjes dhe Policia nisi hetimet duke arrestuar si shkaktarë shtetasit Lulian Agiçi 38 vjeç, Mirgen Sheta 37 vjeç, Atdhe Sula 43 vjeç, Ilir Sula 34 vjeç, Bajram Sula 64 vjeç, Liradin Kraja 61 vjeç, Fatmir Shullazi 47 vjeç, Ilir Babasi 48 vjeç (pronar i furrave të gëlqeres), Dalip Islamaj 49 vjeç, të gjithë me banim në Krujë.
“Shërbimet e Komisariatit të Policisë Krujë, pas informacioneve të siguruara nga strukturat policore, si dhe nisur nga shqetësimet e banorëve, të cilët ndiheshin të rrezikuar nga ndotja e ajrit, pasi disa shtetas në mënyrë të përsëritur në Krastë digjnin furra për prodhimin e gëlqeres, duke përdorur si material djegës mbetje të ndryshme lëkure të fasonerive, goma të përdorura automjetesh dhe materiale të ndryshme plastike dhe sintetike, mbrëmjen e djeshme kanë organizuar punën duke ushtruar kontroll të befasishëm në Krastë”, bëri të ditur Policia.
Sipas njoftimit të dhënë në lidhje me operacionin e kryer, në sajë të operacionit kundër ndotjes së mjedisit për të mbrojtur jetën dhe shëndetin e banorëve, Policia e Krujës ka arrestuar 9 shtetas, të cilët në mënyrë të përsëritur, gjatë prodhimit të gëlqeres përdornin si material djegës materiale të ndryshme plastike, sintetike, mbetje fasonerie dhe goma automjetesh.
“Një aktivitet i tillë ishte shqetësim i madh për banorët e zonës, duke rrezikuar shëndetin dhe jetën e tyre dhe shkaktohej një dëm i madh në ambient”, sqaroi Policia duke theksuar se, në cilësinë e provës materiale është sekuestruar një mjet kamion tip “Mercedez Benz” i ngarkuar me mbetje fasonerie dhe plastike të rrezikshme, që do të përdoreshin për djegie në këto furra në pronësi të shtetasit Ilir Babasi. Prej vitesh, në Krastë të Krujës persona të ndryshëm, të cilët prodhojnë gëlqere nëpërmjet furrave, ndotin ajrin.
Me dhjetëra herë, Policia dhe Agjencitë e Mjedisit kanë sekuestruar mbyllur dhe vënë në pranga pronarët dhe punëtorët e tyre, por sërish ndotja e mjedisit në këtë zonë mbetet evidente. Ky fenomen vijon të jetë prezent përgjatë 28 viteve dhe me shumë gjasa do të vijojë edhe në vitet pasardhëse. Përpos kontrolleve dhe masave administrative, Policia dhe strukturat e tjera shtetërore nuk kanë mundur të eliminojnë ndotjen mjedisore që vjen si pasojë e furrave të gëlqeres.
Ndotja është e përhapur në zona dhe qytete të ndryshme të vendit. Nuk janë vetëm furrat e gëlqeres ato që ndotin mjedisin. Ndotja vjen edhe si pasojë e kanaleve të pusetave të hapura të ujërave të zeza apo edhe djegies së mjeteve në ambiente të hapura siç është edhe rasti i Durrësit. Qyteti bregdetar është ndër më të ndoturit në vend për shkak të djegies së mbeturinave apo edhe kanaleve të hapura të ujërave të zeza, që përshkojnë përmes qytetin turistik.
