Ceremonia e varrosjes së eshtrave të 573 ushtarëve grekë në Këlcyrë, të vrarë në Shqipëri gjatë luftës italo-greke, që u gjetën në fushën e Dragotit, nuk ka kaluar jashtë vëmendjes së mediave greke. Zougla.org në një shkrim të saj ka publikuar një letër të nënkryetarit të parlamentit grek dhe ish-ministrit George Sourla, i cili “kryqëzon” Ministrinë e Jashtme për injorimin e familjarëve të viktimave, të cilët nuk ishin pjesë e ceremonisë. Lexoni më poshtë shkrimin.
Kritikat e opinionit dhe letra e hapur drejtuar Kryeministrit nga nënkryetari i parlamentit grek dhe ish-ministri George Sourla, nuk u mor parasysh.
Ishte mesi i verës që lamë pas kur Greqia më në fund arriti pas 78 vjetësh, të varroste zyrtarisht mbetjet e të vdekurve të rënë gjatë luftës italo-greke në vitet 1940-1941.
Athina dhe Tirana kishin arritur një marrëveshje që pritejk prej kohësh nga fëmijët dhe të afërmit e të vdekurve për atdheun.
Në atë kohë, në verën e vitit 2018, u varrosën eshtrat e 100 ushtarëve grekë, të cilët ishin varrosur rastësisht në pjesë të ndryshme të frontit.
Në letrën e tij,George Sourlas ishte ankuar se Ministria e Jashtme dhe Ambasada e Greqisë në Tiranë, për arsye të panjohura, kishin përjashtuar fëmijët dhe të afërmit e të vdekurve nga ceremonia e varrimit.
Dikush mund ta atribuojë përjashtimin nga indiferenca dhe injoranca kolektive e njohur që ka karakterizuar burokracinë greke gjatë kësaj kohe.
Pas disa muajsh, autoritetet greke më 12 tetor paralajmëruan varrimin e eshtrave të 573 të rënëve në Shqipëri.
Për herë të dytë, Ministria e Punëve të Jashtme, Ambasada e Greqisë në Tiranë, vetë Ministri Nikos Kotzias, udhëheqja ushtarake e vendit, shteti në tërësi i shpërfilli fëmijët dhe të afërmit e të vdekurve. Ata i mbajtën larg prej kësaj përshëndetjeje të fundit.
“Ushtarët e vdekur të luftës nuk i përkasin ministrave, as qeverive e as burokracive, Z. Kotzias. Ata i përkasin historisë së këtij vendi. Mbi të gjitha, këta të vdekur dhe reliket e tyre u përkasin familjeve që u privuan prej tyre dhe i dërguan për të mbrojtur tokat patriotike.
Nuk ka ngjyrë politike, nuk ka dallime klasore, nuk ka sjellje të personalizuara. Ka ushtarë që luftojnë për të gjithë të tjerët.
Është hera e dytë që z. Ministër injoron të drejtën e fëmijëve dhe të afërmve të luftës së viteve 1940 për të marrë pjesë në ceremoninë e varrosjes masive.
Është një mohim historik i shtetit që ju, si ministër, përfaqësoni.
Ne presim shpjegime nëse ka, sepse ju i keni borxh kryesisht të gjithë atyre që janë duke pritur për dekada për të nderuar të vdekurit e tyre”.
