Reshjet e denduara që vazhduan dhe gjatë natës së mbrëmbshme kanë sjellë probleme në aksin Gjirokastër-Tepelenë ku raportohet për rrëshqitje të dherave.
Vështirësi paraqet ende aksi Tepelenë-Gjirokastër, ku po punohet për heqjen e dheut në segmentin Shkallë e Zezë-Uji Ftohtë.
Në Gjirokastër raportohet se ka rënë niveli i prurjeve të përrenjve dhe po punohet në përroin e Gjokanës pasi ka shumë inerte në rrugë.
Probleme ka pasur në mëngjes edhe në aksin rrugor Virua Kordhoc, por tanimë është zhbllokuar.
Gjithashtu, po punohet për zhbllokimin e akseve Tepelenë-Këlcyrë, Përmet-Çarshovë dhe Vlorë-Selenicë, ndërsa në akse të tjera po punohet për eliminimin e rrëshqitjeve të dherave.
Gjithashtu edhe ne veri të vendit moti vijon të jetë i rënduar.
Aksi Qafë e Buallit-Bulqizë kalohet me probleme për shkak të pranisë së ujit në rrugë.
Problemet në këtë aks vijnë edhe si pasojë e rrëshqitjeve të inerteve. Ndërkohë, të dëmtuara nga përmbytjet janë edhe dy ura, ndërsa është në rrezik edhe argjinatura e lumit Drin, në Gjoricë.
Në aksin rrugor Fushë-Krujë-Laç kalojnë vetëm kamionët dhe fuoristradat. Është vetë policia që e ka bërë të ditur këtë gjë, duke kërkuar nga drejtuesit e mjeteve që të mos ecin me shpejtësi. Aksi rrugor i kalueshëm me vështirësi vetëm për mjetet e mëdha dhe ato të larta.
/AlpeNews.al./
