Kur mbeteshin dhe diçka më pak se 15 minuta nga përfundimi i provave të dyta të lira në pistën e Buriramit për Çmimin e Madh të Tailandës, majorkani jorge Lorenzo ka pësuar një rënie brutale për arsye të panjohura. Gjithçka ndodhi pasi atij iu bllokua goma e pasme. Për fat të mirë spanjolli nuk u dëmtua, përveçse ka marrë disa plagë në dorë dhe në njërin kyç të këmbës.
Aksidenti ndodhi në pjesën e pistës së Buriramit ku pilotët arrijnë shpejtësinë në 320 km/h dhe më pas duhet ta reduktojnë atë në 75 km/h. Por, pas frenimit ai ka humbur kontrollin dhe më pas ka pësuar një rënie të rëndë. Ndërkohë që motori i tij Ducati është copëtuar dhe kjo ka detyruar komisarët e pistës që të shenjojnë me flamur të kuq, e si për pasojë sesioni i provave u ndërpre.
Të mos harrojmë se Jorge Lorenzo u rikthye të garojë për Çmimin e Madh të Tailandës pas vizitës me mjekun për dëmtimin që pësoi në këmbë në Çmimin e Madh të Aragonit. Pas rënies së dytë Lorenzo u vizitua në spital, kreu dhe ekzaminimet radiografike për të parë nëse do të kishte thyerje apo nxjerrje të ndonjë kocke, por çdo gjë rezultoi se nuk kishte probleme të mëdha shqetësuese.
