Detaje të tjera zbulohen nga operacioni i disa ditëve më parë, që u finalizua me arrestimin e dy shtetasve amerikanë si prodhues droge. Bëhet fjalë për Arbër Isakun, shqiptaro-amerikan dhe Vincent DeCaro, të cilët u arrestuan më 21 shtator në Kukës, ku po tentonin që të largoheshin nga Shqipëria.
Burimet pranë grupit hetimor thonë për “Panorama” se DeCaro dhe Isaku ishin të skeduar edhe më parë për aktivitetin e paligjshëm të prodhimit dhe shitjes së lëndëve narkotike, konkretisht, prodhimin e drogave sintetike. Për ta ishin lëshuar urdhërarreste në SHBA. “Panorama” publikon edhe fotot e dy të arrestuarve, të cilët pritet që të ekstradohen tashmë në Shtetet e Bashkuara të Amerikës. Arbër Isaku është i moshës 29 vjeç dhe ka lindur në SHBA ku edhe është rezident.
Rreth një vit më parë, Policia në shtetin e Konektikat ka gjetur në banesën e tij rreth 160 gramë lëndë fentanyl dhe 200 tableta nga 40 gramë të dyshuara si lëndë psikotrope. Që në atë kohë, Policia amerikane skedoi të riun dhe nisi hetimet në gjendje të lirë. Mirëpo, duke ndjerë rrezikun, Isaku së bashku me DeCaron u larguan duke ardhur në Shqipëri. Këtu ata dyshohet se kanë nisur aktivitetin e prodhimit të lëndëve psikotrope, që shiteshin në lokalet e natës.
Prokuroria, edhe pse nuk ka gjetur drogë në apartamentin e dy të rinjve që ndodhej në afërsi të ish-Parkut të Autobusëve, dyshon fort se ata kanë prodhuar lëndë të ndaluara dhe i kanë shitur ato në kryeqytet. Ky dyshim i arsyeshëm bazohet në materialet dhe sendet që kanë gjetur efektivët e Policisë në apartamentin në fjalë, të cilat janë sekuestruar në cilësinë e provës materiale.
Ndërkohë, Gjykata e Kukësit ka dhënë disa ditë më parë masën e arrestit me burg me afat 30- ditor, për efekt ekstradimi në Shtetet e Bashkuara të Amerikës. Tani procedurat e ekstradimit kanë nisur në bazë të marrëveshjes. Mirëpo, burime brenda Prokurorisë së Krimeve të Rënda thonë se edhe autoritetet në Shqipëri mund të nisin procedim penal për llogarinë e tyre për dy amerikanët e arrestuar, duke qenë se ka dyshime se vepra penale e prodhimit të narkotikëve të jetë konsumuar edhe brenda territorit të Shqipërisë.
Substancat që përdornin dy të arrestuarit për të derivuar drogën sintetike ishin medikamente që përdoreshin nga veterinerët për trajtimin e kafshëve të ndryshme. Droga në fjalë, që shitet më së shumti në lokalet e natës, sjell pasoja të rënda te konsumuesit, duke krijuar halucinacione dhe mosfunksionim të metabolizmit.
