Një shqiptar e ka pësuar keq në Maltë, pasi është përfshirë në një ngjarje sa të çuditshme aq edhe të pabesueshme.
Shqiptari L.Sh, 37 vjeç gjeti një portofol të humbur ku brenda ndodheshin 120 euro dhe disa karta bankare. Ai mori një prej kartave dhe tentoi të tërheqë para nga bankomati, por më kot pasi nuk i dinte kodin.
Ai më pas vendosi të dorëzojë në stacionin policor portofolin me të gjitha kartat dhe 120 euro të gjetura. Por para se ta bënte këtë veprim, ai mori 10 euro nga portofoli dhe i shpenzoi për të blerë një paketë cigare.
Tashmë gjykata e akuzon për tre akuza të rënda; vjedhje, tentativë vjedhje dhe mashtrim.
Kjo pasi 37-vjeçari pranoi që kishte tentuar të tërhiqte para si dhe pranoi që kishte shpenzuar 10 euro për të blerë cigare.
“Të huajt nuk mund të vazhdojnë të vijnë këtu me shpresën se do të gjejnë një punë dhe përfundojnë duke vjedhur”, u shpreh gjykatësi Caruana Lee.
Por avokati mbrojtës Ishmael Psaila nënvizoi faktin se shqiptari kishte harxhuar vetëm 10 euro dhe kërkoi që ndëshkimi të mos ishte i rëndë.
Gjykata e dënoi me 14 muaj burg, por u la i lirë me kusht.
