Kur kanë kaluar më shumë se 48 orë nga ngjarja e ndodhur te “Komuna e Parisit”, ku u dhunua barbarisht biznesmeni Andrea Zoga, ende nuk ka asnjë person të ndaluar si autor të dyshuar.
Policia tha dy ditë më parë se autorë të ngjarjes dyshohet të kenë qenë tre persona, megjithatë ende nuk janë identifikuar. Vetë biznesmeni ka dyshime se pas kësaj ngjarjeje fshihet një person, të cilin ai e përmend me emër, Eltjon Bodinaku, që ai e ka denoncuar edhe një muaj më parë për kanosje, por ende nuk dihet nëse ky person është shoqëruar apo jo.
BIZNESMENI Andrea Zoga tha se nuk i ka parë personat që e dhunuan, pasi ishin të maskuar, por më parë ai është kërcënuar nga një person i quajtur, Eltjon Bodinaku. Ai ka thënë se ka kallëzuar në Prokurori kur e goditën herën e parë para biznesit të tij, por prokurori Julian Zonja e ka mbyllur çështjen pa e thërritur fare.
Biznesmeni ka treguar rreth gjendjes shëndetësore dhe idesë për t’u larguar nga vendi nëse nuk arrestohen personat. Ngjarja ka ndodhur mbrëmjen e së martës, rreth orës 23:30, pranë kompleksit “Kika”, që ndodhet në rrugën “Medar Shtylla”, te “Komuna e Parisit”. Zoga ka qenë duke shkuar drejt shtëpisë së tij, kur është përballur me pritën që i kishin zënë dy persona.
Ai ka deklaruar se fillimisht kanë qenë dy persona me kapele që e kanë sulmuar, më pas edhe 4 të tjerë që kanë zbritur nga një makinë. Zoga shprehet se e gjithë ngjarja ka ndodhur para një banke të nivelit të dytë që ndodhet aty dhe gjithçka është filmuar nga kamerat e sigurisë, që mund të shërbejnë si provë për grupin hetimor.
Ndërsa sqaron se nuk i njeh personat që e sulmuan, por ata që e kanë kërcënuar edhe më parë për të njëjtën çështje, e di mirë se kush janë. Ai thotë se gjendja e tij shëndetësore nuk është e mirë, pasi ka plagë në fytyrë, në trup dhe në të dy këmbët. Ndërsa ka kryer edhe një ekzaminim mjekoligjor.
Zoga falënderon Policinë dhe Kryeministrin, tek i cili thotë se e ka denoncuar ngjarjen. Megjithatë, shprehet se në rast se kjo ngjarje nuk do të zbardhet, por do të pushohet si ngjarjet e mëparshme, do të largohet nga Shqipëria bashkë me familjen për të qenë më i sigurt.
