Kur kanë mbetur më pak se 72 orë deri në skadimin e afatit që gjyqtarët e apeleve në rrethe kanë për të kandiduar si pjesë e Këshillit të Lartë Gjyqësor, asnjë prej tyre nuk ka shfaqur interes për këtë post. ReportTv është interesuar pranë gjykatës së Lartë e cila më 22 gusht rishpalli vakancën në KLGj, dhe përgjigja e marrë ishte se nga ajo datë e deri më sot kur shënon 3 shtator 2018 asnjë aplikim nuk është regjistruar.
Me shkarkimin nga vettingu të gjyqtarit të apelit Durrës Besim Trezhnjeva njëherazi dhe anëtar në KLGJ vendi i tij ka mbetur bosh, duke futur në ngërç dhe KLGJ e cila nuk mund të mblidhet me një anëtar më pak. Edhe ambasada amerikane u bëri thirrje pak ditë më parë gjyqtarëve të aplikojnë për t’’u bërë pjesë e KLGJ por kjo thirrje duket sikur nuk i ka bindur asnjë prej tyre të bëhen pjesë e KLGj-s.
