Djegia e banesës tre ditë më parë e shtetasit Enver Emini në lagjen “Kryengritja e Fierit” e ka lënë këtë të fundit në qiell të hapur.
Këtë të hënë, Enver Emini, i është drejtuar Bashkisë së Fierit për të kërkuar një banesë për të jetuar pasi nga zjarri janë djegur të gjitha orenditë shtëpiake.
Kërkoj shtëpi urgjentisht nga kryetari i Bashkisë se do të fle përjashta, do të marr kalamajtë dhe do të fle tek dera e Bashkisë. Nuk kam ku vete. Për mua çdo gjë ka marrë fund. Ose do të marr shishen e benzinës dhe do ti vë shkrepsen vetes këtu, do të digjem para Bashkisë.Nuk kam çfarë humb më, nuk kam asgjë. I lutem kryetarit të bashkisë të vërë dorën në zemër se është dhe vetë familjar, të mendojë dhe për fëmijët e mi, ka thnë Emini për ora news.
Banesa u përfshi nga flakët gjatë pasdites të së premtes në lagjen “Kryengritja e Fierit “ dhe nga hetimet paraprake u mësua se shkak ka qënë një shkëndijë elektrike. Nga zjarri u shkaktuan shumë dëme materiale, ku janë djegur pajisje elektroshtëpiake dhe orendi të tjera.
Banesa private në të cilën jetonte shtetasi Enver Emini ishte me qira dhe jetonin 3 anëtarë të familjes Emini.
