Paraditen e sotme Kryeministri italian Giuseppe Conte ka takuar familjarët e viktimave të shënuara nga rrëzimi i urës së Morandit në Genova.
Mediat italiane bëjnë me dije se Kryeministri Conte ka shkuar në morgun e spitalit San Martino dhe ka ngushëlluar familjarët e personave që humbën jetën, ndërsa është shprehur se kjo tragjedi nuk duhet të ndodhte.
Mësohet se për disa minuta ka qëndruar edhe me të afërmit e dy të rinjve shqiptarë që humbën jetën në tragjedinë e djeshme.
Dy të rinjtë Marjus Djerri 22 vjeç nga Shijaku dhe kolegu i tij shqiptar Edi Bokrina 31 vjeç nga Shkodra ishin duke shkuar në punë mesditën e djeshme kur u shemb ura në Genova. Mësohet se dy viktimat janë gjetur nën rrënoja.
Të shumtë kanë qenë personat që kanë shprehur ngushëllimet për djemtë shqiptarë.
Kujtojmë se shembja e urës në Genova ditën e djeshme la si pasojë 37 të vdekur ndërsa ekipet e emergjencës po gërmojnë ende nën rrënoja.
