Futbolli është tashmë një fenomen social e kulturor masiv, që përfshin komunitete gjithmonë e më të gjera dhe mbetet një faktor ekonomik gjithmonë në rritje.
Kategoria Superiore për sezonin që u mbyll kap afërsisht vlerën e 50 mln eurove. Kjo vlerë llogaritet nga totali i të gjithë futbollistëve të ekipeve të Kategorisë Superiore.
Futbolli shqiptar është duke u rritur vit pas viti dhe rasti më konkret është ai i Skënderbeut, ku në një hark kohor të shkurtër, falë një menaxhimi professional, ka arritur të prodhojë miliona, të cilat kanë lëvizur tregun e futbollit shqiptar.
Mjaftoi vetëm një fitore ndaj Dinamos së Kievit, në fazën e grupeve të Europa League dhe Skënderbeu do të fitonte një shumë të majme prej 4 milionë eurosh në total. Një shifër stratosferike kjo për ekipet e futbollit shqiptar, të cilat po integrohen vit pas viti në futbollin europian.
Skënderbeu nuk ka shënuar vetëm rritje në renditjen e përgjithshme të UEFA-s, por edhe në vlerën totale të lojtarëve që sipas portalit të specializuar “Transfermarkt”, tashmë ka shkuar në 7.5 milion euro. Një shifër shumë e lartë kjo, pasi asnjëherë më parë Skënderbeu nuk ka qenë në të tilla nivele.
Përgatiti: AlpeNews.al
