Albin Kurti është një histori njerëzore, pa dyshim dhe politike. Para lufte, ai ishte në krye të protestave studentore, dhe që atëherë, e gjitha jeta e tij ka qenë e bashkëshoqëruar me burgun, prangat, të cilat i ka të pranishme dhe sot, gjithmonë për të njëjtat arsye.
Pas përfundimit të luftës, Albin Kurti si udhëheqës i ‘Vetëvendosjes’, ka organizuar shumë protesta duke u përballur kështu me të gjitha qeveritë. Rasti i fundit i arrestimit të tij është ai i ditës së sotme, ku Kurti është arrestuar nga Policia e Kosovës në bazë të urdhër-arrestit të lëshuar ndaj tij për rastin e gazit lotsjellës. Ai u arrestua teksa po hynte në objektin e Kuvendit të Kosovës për vazhdimin e seancës.
Ja kronologjia e arrestimeve të tij ndër vite:
27 prill 1999, Kurti u arrestua nga policia serbe . Më 10 qershor, me tërheqjen e forcave serbe në Serbi, ai së bashku me të burgosurit tjerë shqiptarë u transferua në burgjet serbe. Më 13 mars 2000 në Nish, Albini u dënua me 15 vjet burg të rëndë. Si rezultat i presionit ndërkombëtar Albini u lirua më 7 dhjetor 2001.
12 qershor 2005, në muret që rrethonin ndërtesën e UNMIK-ut, aktivistët shkruan parullën ‘Jo negociata, Vetëvendosje’. Kjo solli transformimin e KAN-it në Lëvizjen ‘Vetëvendosje’. Edhe kësaj here Kurti përfundoi në pranga.
10 shkurt 2007, ditën që ‘Vetëvendosje’, organizoi demonstratën paqësore në Prishtinë kundër Planit Ahtisari. Gjatë kësaj proteste u vranë dy protestues, Edhe pas kësaj u arrestua Albini i cili u mbajt në burg për 5 muaj dhe nën arrest shtëpiak edhe 5 muaj e gjysmë të tjerë.
27 janar 2015, Albin Kurti u arrestua për shkak të zhvillimit të protestave të cilat degjeneruan në dhunë, ku u lënduan shumë policë e protestues.
Përgatiti: AlpeNews.al
