Prokuroria ka nxjerrë në dritë emra të rinj te shefave të Policisë së Shtetit, si të implikuar në trafikun e drogës të lidhur me bandën e narkotrafikut ndërkombëtar ‘Habilaj’.
Hetimi për ‘Dosjen Habilaj’, një ndër bandat narkotrafikante më të përfolura gjatë kohëve të fundit në Shqipëri, ka përfshirë më shumë së rreth 40 persona.
Janë lëshuar urdhër-arreste për 3 persona, të cilët dyshohen se kanë qenë të përfshirë në bandën e Habilajve për trafikun e lëndëve narkotike.
Urdhër arrestet janë shpërndarë për Jaeld Çelën, Sokol Boden si edhe Gjergj Kohilën.
Por kush janë të dyshuarit të cilët mbanin poste të rëndësishme në Policinë e Shtetit?
JAELD ÇELA– ish drejtori i Policisë së Vlorës.
Çela ka drejtuar policinë e Vlorës nga shtatori 2014 deri në prill të 2017, ndërsa më parë ka drejtuar drejtorinë e policisë së Durrësit.
Pas ardhjes së Fatmir Xhafës në krye të Ministrisë së Brendshme, Jaeld Cela u shkarkua nga detyra dhe në Policinë e Vlorës u emërua Gentjan Shehaj.
DEKLARIMI I PASURISË- Të ardhura nga paga si zëvendësdrejtor për krimet në drejtorinë e policisë në qarkun, Durrës për periudhën 01.01.201405.08.2014 dhe drejtor në Drejtorinë e Policisë së qarkut, Vlorë, 941 773 lekë.
Bashkëshortja, Laura Çela, të ardhura nga paga në Revista Media Union dhe në Bankers Petrolium, 1 283 172 lekë.
Kredi hipotekore 35 000 euro, me afat 20 vjet, marrë më 2007. Detyrimi financiar i pashlyer, 26 000 euro.
Sokol Bode– ish Shef i Seksionit për Hetimin e Krimeve
Prej kohësh Bode ka qenë në vëmendje pasi janë publikuar fotot ku ai shfaqet me vëllezërit Habilaj, dy prej të cilëve janë arrestuar nga drejtësia italiane pak kohë më parë për trafik drogë.
Sokol Bode u transferua nga drejtor i postës në Dhërmi në prill të këtij viti në Shkodër ku iu dha posti si Shef i Seksionit për Hetimin e Krimeve. Në 7 prill të këtij viti ai ka marrë masë disiplinore nga Drejtoria e Standardeve Profesionale dhe ka qenë në hetim edhe nga SHÇBA, pasi në njësinë Administrative ‘Guri i Zi’ në Shkodër u zbulua një mini sere ku u gjetën 87 kubikë kanabis. Përveç këtij për këtë rast kanë qenë në hetim edhe 4 punonjës të tjerë policie.
Gjergji Kohila- ish shefi i sektorit të luftës kundër krimit të organizuar në drejtorinë e Qarkut Vlorë.
Ndaj tIJ prokuroria lëshoi sot një urdhër-arresti, pasi dyshohet si i përfshirë në dosjen ‘Habilaj’ për trafikun e lëndëve narkotike.
Gjergji Kohila, nga Delvina, para se emërohej në këtë detyrë, ka qenë efektiv policie në Sarandë. Ai është nipi i ish-Kryetarit të PS dhe njëkohësisht ish-n/prefektit të Delvinës, Agron Kohila. Ky i fundit një emër i përfolur nga Lëvizja Socialiste për Integrim. Më herët LSI denoncoi lidhjet nepotike në Delvinë, ku akuzonte Agron Kohilën, se kishte punësuar fisin, përfshi edhe nipin e tij Gjergji Kohila.
Përgatiti: AlpeNews.al
