Zvarritjet në ngritjen e institucioneve të reja të drejtësisë, po pengojnë zinxhir njëra tjetrën, duke e çuar sistemin në kolaps. Institucioni i radhës i rrezikuar është Këshilli i Emërimeve në Drejtësi. Për këtë institucion ka një përplasje të re.
Ligji i ri parashikon që Presidenti duhet të hedh shortin deri në datë 5 dhjetor, por ka vakum, pasi institucionet e KLGJ dhe KLP që duhet të sjellin kandidaturat për KED ende nuk janë ngritur.
Presidenti është konsultuar paraprakisht me Euralius për ngërçin, ndërsa ka vendosur që t’i dërgojë një letër Kuvendit.
Report Tv është njohur me përmbajtjen e letrës, ku Meta kërkon nga Kuvendi të zgjidhë boshllëkun ligjor. “Duhet të hedh shortin deri në 5 dhjetor për KED, por ka vakuum.
Kandidaturat i sjell KLGJ e KLP, por këto dy institucione nuk janë formuar. Kuvendi bëri ligjin për institucionet e reja, kërkoj të zgjidhni boshllëkun ligjor”.
Pas lajmit të publikuar nga Report Tv ka reaguar Kuvendi duke i kthyer përgjigje Presidentit se ka zyrtarizuar datën 7 dhjetor për hedhjen e shotit për KED.
“Në mbështetje të pikës 3 të nenit 149/d dhe pikës 11 të nenit 179 të Kushtetutës së Republikës së Shqipërisë dhe nenit 284 të ligjit nr. 115/2016 “Për organet e qeverisjes së sistemit të drejtësisë”, në datë 7 dhjetor 2017 ora 10:00, do të hidhet shorti për zgjedhjen e anëtarëve të Këshillit të Emërimeve në Drejtësi. Hedhja e shortit do të zhvillohet në Kryesinë e Kuvendit të Shqipërisë.
Shorti është i hapur dhe zhvillohet në prani të: -përfaqësuesve të dërguar nga Gjykata Kushtetuese, Gjykata e Lartë, Prokuroria e Përgjithshme dhe Këshilli i Lartë i Drejtësisë
-përfaqësuesve të grupeve parlamentare
-përfaqësuesve të përfaqësive të huaja diplomatike të akredituara në Republikën e Shqipërisë dhe organizatave partnere ndërkombëtare
-medias
