Mëngjesin e sotëm përpara Komisionit të Pavarur të Kualifikimit ka dalë Gjyqtari i Gjykatës së Lartë, Admir Thanza i cili nuk i është konfirmuar deklarimi i pasurisë nga kontrolli i kryer në të gjashta shtyllat e Vetting-ut.
KPK sqaron se Thanza nuk posedon informacion të mjaftueshëm për ILDKPI dhe pasurinë e tij.
Vlera e apartamentit nuk përputhet me çmimin e tij, raportohet të jetë thënë në seancë.
MË HERËT
Gjyqtari Admir Thanza do të përballet sot me Komisionin e Pavarur të Kualifikimit. Ai zotëron një pasuri familjare me vlerë rreth 50.5 milionë lekë, ndërkohë që të ardhurat kryesore rrjedhin nga aktiviteti i bashkëshortes si notere.
Anëtari i Gjykatës së Lartë, Admir Thanza do të përballet më 10 korrik me Komisionin e Pavarur të Kualifikimit. Seanca dëgjimore është planifikuar të drejtohet nga Brunilda Bekteshi, me anëtarë Lulzim Hamitaj dhe Olsi Komici.
Thanza e ka filluar karrierën në gjyqësor në vitin 1992, pas diplomimit në Fakultetin e Drejtësisë. Ai ka punuar në Gjykatën e Shkodrës në vitet 1992-2006, në atë të Tiranës në vitet 2006-2009 si dhe ka qenë anëtar i Gjykatës Kushtetuese në vitet 2009-2013. Thanza ka qenë gjithashtu edhe anëtar i Këshillit të Lartë të Drejtësisë.
Krahas ushtrimit të detyrës së gjyqtarit, Z. Thanza ka punuar edhe si pedagog i jashtëm në universitetin “Luigj Gurakuqi” në Shkodër si dhe pedagog i të Drejtës Civile dhe të Drejtës Kushtetuese në Universitetin Europian të Tiranës dhe atë “Justiniani i Parë”. Prej vitit 2013, Thanza ushtron detyrën e gjyqtarit në Gjykatën e Lartë.
