Kryetari i Partisë Demokratike Lulzim Basha u ka bërë thirrje ambasadorëve të akredituar në Shqipëri që të reagojnë për ligjin që lejon shkatërrimin e Teatrit Kombëtar, duke thënë se ky projekt është pastrim parash. Gjithashtu Basha i ka kërkuar Presidentit që të mos dekretojë ligjin për teatrin, ndërsa ka theksuar se do të jenë me artistët dhe qytetarët në mbrojtje të godinës.
Në një deklaratë për mediat nga selia blu, Lulzim Basha theksoi se djegia e mandateve të opozitës është gjëja më e thjeshtë, kurse synimi është “çlirimi i Parlamentit nga banda e hajdutëve”.
Votimin e djeshëm në Kuvend me 75 vota pro shembjes së teatrit, Basha e konsideron kriminal dhe korruptiv. Ndërsa akuzon Kryeministrin Edi Rama se me projektin e ndërtimit të teatrit të ri dhe të kullave, do të pastrojë paratë e drogës.
“Akti i djeshëm është një lijgjg që ligjëron vjedhjen, i vetmi qëllim është vjedhja e tokës. Qëllimi kryesor është qarkullimi dhe pastrimi i parave të pista të drogës dhe korrupsionit. Këto para nuk mbahen dot në thasë dhe unk futen dot të gjitha në bankë. Ndaj Edi Rama ka planifikuar kulla. Ligji që ka miratuar dje Kuvendi është antikushtetuse. Dje kuvendi ka votuar për të ligjëruar plaçkitjen dhe krimin, ka konsumuar krimin më të rëndë në historinë e tij 27-vjeçare. Sot krimi dhe korrupsioni është ligji i këtij vendi me vendin e 75 hajdutëve.
Projekti i Edi Ramës është një akt barbar, që nuk guxuan ta bëjnë dot as komunistët. Edi Rama është një shkatërrues serial. I bëjmë thirrje presidentit të mos dekretojë ligjërimin e vjedhjes. Forca e vetme që ka Edi Rama është indiferenca jonë. I bëj thirrje ambasadorëve, ja ku keni një projekt të pastrimit të parave, ja ku keni një tufë me peshq të mëdhenj. Nëse nuk flisni sot, nuk ka për t’ju besuar askush kur të flisni nesër. Parlamenti, i kthyer në noter të akteve kriminalo-korruptive, do të çlirohet nga banda e hajdutëve ose do të zhbëhet nga forca e njerëzve të bashkuar”, deklaroi kryedemokrati Lulzim Basha. /tvklan.al
