Parlamenti në Tiranë shqyrton sot me procedurë të përshpejtuar projektligjin, që parashikon ndërtimin e një teatri të ri, në vendin ku gjendet prej 73 vjetësh Teatri Kombëtar duke e shembur ekzistuesin.
Projekt-ligji kaloi me procedurë të përshpejtuar në komisionet parlamentare, me gjithë kundërshtimet e opozitës, të cilët hedhin akuza ndaj maxhorancës për një aferë korruptive.
Prej ditësh opozita i është bashkuar protestës së qindra qytetarëve, artistëve dhe aktivistëve që kundërshtojnë shembjen e Teatrit Kombëtar, si pjesë e trashëgimisë kulturore të Shqipërisë.
Kryetari i Partisë Demokratike, Lulzim Basha nënshkroi mbrëmë peticionin qytetar, duke u shprehur se edhe votat e opozitës janë kundër këtij projekt-ligji dhe se “Teatrin do ta mbrojmë me trupat tanë”.
Ndërkaq opozita ka paralajmëruar aksione të tjera gjatë ditës së sotme. Ndërsa pritet të nisë seanca, PD do të mbledhë grupin parlamentar për të konkluduar detajet e fundit të reagimeve.
Nga ana tjetër qytetarët dhe artistët kanë njoftuar një tjetër tubim para parlamentit në përpjekje për të ndërgjegjësuar deputetët që të mos e votojnë një projekt-ligj, i cili hap rrugë rrëzimit të një objekti historik sipas tyre.
