Ministrja e Arsimit, Lindita Nikolla në një lidhje direkte nga zyra e saj për “Tonight Ilva Tare” thotë se 200 shkolla janë në gjendje të vështirë, por shton se jo domosdoshmërish cilësia në arsim është tulla dhe llaç.
Nikolla: Sot janë 200 shkolla në gjendje të vështirë. Janë kryesisht shkolla me pak nxënës. Kemi punuar në dy vektorë, i pari largimi i nxënësve në ato shkolla dhe grupimi i tyre duke mbuluar transportin. Ashtu sikurse edhe adresimi i buxheteve ka bërë të mundur uljen në 200 të shkollave që kanë nevojë për ndërhyrje në infrastrukturë. Mund të sillja para jush shumë foto se si kanë qenë shkollat dhe se si kanë ndryshuar. Po i referohem edhe Laçit, ku ishim në tre shkolla, në një kopsht, një shkollë fillore dhe një gjimnaz nga më të rëndësishmit ku nuk ishte bërë asnjëherë ndërhyrje. Cilësia në arsim nuk është domosdoshmërish tulla dhe beton. Ne do të punojmë fort për cilësinë e mësuesve.
