Mbrëmjen e së enjtes u bë e ditur se ishte grabitur posta e Durrësit.Ndonëse nuk u dhanë shumë detaje u bë e ditur se ishte bërë i mundur arrestimi i autorëve.
Mirëpo, sot pas dy ditësh detaje të reja kanë dal në dritë, e jo vetëm që grabitësit nuk janë arrestuar por janë shpallur dhe persona në kërkim.
Kjo nuk është hera e parë që Durrësi tronditet nga grabitje të tilla e të pazbardhura. Këto të fundit nuk konsiderohen vjedhje të zakonshme pasi autorët duket që kanë qëllime të tjera që kanë të bëjnë me problemet e tyre me drejtësinë, pasi vjedhja nuk bëhet për para.
Çfarë ndodhi para dy ditësh dhe zbardhja sot:
Autorët pasi kanë marrë tre kasaforta në postë, janë larguar me një makinë të vjedhur në Lushnje më 16 qershor dhe targa të vjedhura zonën e Laçit më 27 qershor, pra një ditë para grabitjes.
Në ndjekje të tyre është vënë një efektiv i policisë së Durrësit, i cili për pak sa nuk ka rrezikuar jetën. Burime policore bëjnë me dije se motori me të cilin udhëtonte efektivi Julian Kastrati është përplasur nga makina e grabitësve dhe për pasojë ai është rrëzuar, duke u dëmtuar në këmbë. Por jo vetëm kaq, ata kanë qëlluar në drejtim të tij edhe me armë.
Pasi janë siguruar se e kanë shmangur policinë e kanë braktisur mjetin tek vaskat e peshkut dhe janë arratisur.
Posta sekrete e Prokurorisë
Nëse kthehemi një muaj pas, kujtojmë se më datë 8 Maj u dhunua edhe posta sekrete e Prokurorisë. Autorët grabitën postierin, që po çonte dokumentat.
“U grabita nga dy persona te maskuar afer prokurorise ne nje rrugice, nderkohe qe po coja posten”, tha ai.
Prokuroria e Durrësit
Po në 24 Maj, është bastisur gjatë natës prokuroria e Rrethit Gjyqësor Durrës nga persona të paidentifikuar që kanë hyrë në zyrat e prokurorëve dhe kanë marrë prej andej dokumente e materiale të ndryshme.
Denoncimi u bë nga pastruesja e cila sapo ka mbërritur në punë ka pikasur dyer e dëmtuara të prokurorisë.
/AlpeNews.al
