Prokurorët që po hetojnë vdekjen e dyshimtë në nëntor 2016 në paraburgimin e Prizrenit në Kosovë, të aktivistit të Vetëvendosjes, Astrit Dehari, kanë të paktën 46 pyetje për ekspertët mjeko-ligjore që mbikqyrën autopsinë.
Këto pyetje janë përcjellë nga autoritetet kosovare të drejtësisë përmes letërporosive për një prej dy ekspertëve, i cili jeton në Shqipëri.
“ABC News” ka një kopje të vendimit të Gjykatës së Tiranës që i dha dritë jeshile ekzekutimit të letërporosisë për pyetjen e ekspertit mjeko-ligjor Besim Ymaj, ish-drejtuesi i Institutit të Mjekësisë Ligjore në Tiranë.
Në pyetjet e përcjella për ekspertin Ymaj, hetuesit kosovarë kërkonin saktësimin e paqartësive në aktin e përpiluar prej tij, apo shpjegime për përfundimet e tij. Në një prej pyetjeve, pasi citonin dëmtimet e jashtme të konstatuara tek viktima, mes të cilave lëndime trupore dhe një brinjë e thyer hetuesit pyesin: “A ekziston mundësia që këto lëndime dhe forca shtytëse më intensitet të lartë të vetëshkaktohen nga viktimat”?
Me tej, ata kërkonin: “A mund të na i shpjegoni nga aspekti shkencor, nëse viktima tenton të kryejë vetëvrasje si do të reagonte në rast të vetëlëndimit krahasuar me lëndimet që i ka pasur i ndjeri Astrit Dehari?
Ndër të tjera pyetje Ymaj duhet t’i përgjigjet se “në cilat raste viktima heq dorë nga kryerja e aktit të vetërasjes kur e ka filluar veprimin”?
