Qeveria ka miratuar disa ndryshime në vendimin e datës 7 shkurt 2018 ku përcaktohet mënyra e shpërndarjes së fondeve për zhvillimin rural, me fokus mbështetjen e agroturizmit. Ndryshimet në thelb zgjerojnë gamën e përfituesve të mbështetjes financiare për diversifikimin e aktivitetit ekonomik në zonat rurale.
Vendimi i shkurti përcaktonte mbështetje financiare për ngritjen ose rikonstruksionin e ambienteve për veprimtari turizmi nga 6 deri në 10 dhoma, të cilat financoheshin deri në 50 % të faturave tatimore por jo më shumë se 1.5 milion lekë.
Me ndryshimet e reja, parashikohet mbështetja financiare edhe për ata që ndërtojnë më pak, 4 dhoma.
- Ishte
Për diversifikimin e aktivitetit ekonomik në zonat rurale:
Mbështetje për ngritjen ose rikonstruksionin e ambienteve për veprimtari të turizmit rural nga 6 deri në 10 dhoma, në 50% të vlerës totale të faturave tatimore, por jo më shumë se 1 500 000 (një milion e pesëqind mijë) lekë;
- Bëhet
Mbështetje për ngritjen ose rikonstruksionin e ambienteve për veprimtari të turizmit rural nga 4 deri në 10 dhoma, në 50% të vlerës totale të faturave tatimore, por jo më shumë se 1 500 000 (një milion e pesëqind mijë) lekë
Një ndryshim tjetër është ai që parashikon mbështetjen e investimeve më të vogla në zonat rurale. Vendimi i shkurtit 2018 parashikonte mbështetjen e investimeve në agroturizëm kundrejt planit të biznesit në 50% të vlerës totale të faturave tatimore, por jo më shumë se 20 milion lekë. Me ndryshimin e një dite më parë, mbështetja do të jetë e njëjtë, në masën 50%, por jo më shumë se 10 milionë lekë. Pra, është ulur masa e financimit.
- Ishte
Mbështetje për investime në agroturizëm kundrejt planit të biznesit, në 50% të vlerës totale të faturave tatimore, por jo më shumë se 20 000 000 (njëzet milionë) lekë
- Bëhet
Mbështetje për investime në agroturizëm kundrejt planit të biznesit, në 50% të vlerës totale të faturave tatimore, por jo më shumë se 10 000 000 (dhjetë milionë) lekë
Një ndryshim tjetër është ai që parashikon që për fondet e mësipërme, pra për mbështetjen financiare për ngritjen e rikonstruksionin e ambienteve për veprimtari të turizmit dhe për mbështetjen e investimeve deri në 10 milion lekë, të shtrihen përtej projektit 100 fshatrat.