Ky është Xhafer Meta, 31 vjeçari që u vetëvra dje pasi vrau ish të dashurën e tij 19-vjeçare, Xhuljeta Çuni. Meta ishte i divorcuar me një fëmijë dhe aludohet se e la gruan për Xhuljetën. Kur kjo e fundit i kërkoi ndarjen, Meta e qëlloi me armë në mes të rrugës. Më pas kaloi nga ana tjetër dhe qëlloi veten. Çuni vdiq në vend, ndërsa ai, disa orë më vonë në Spitalin e Traumës.
Shqiptarët gjetën profilin në Facebook të të ndjerit dhe postimet e fundit u kthyen në forume publike. Komentuesit janë të disa kategorive: Disa shajën Metën, disa shajën sharësit e Metës. Disa i urojnë xhehnetin, disa xhehnemin. Dhe disa të tjerë bëjnë fajtore vajzën, viktimën.
Volumi është shumë i madh, reagimi po aq divers sa i njëjtë, por sidoqoftë dal në dy përfundime. Ne nuk dimë të diskutojmë për fenomenin, pa ofenduar kënd e pa drejtuar gishta. Dhe së dyti, gruaja është gjithnjë fajtore.
