Kontrolli i Lartë i Shtetit ka kallëzuar në prokurori ish-Drejtorin Ekzekutiv të Autoritetit të Aviacionit Civil, Feliks Baçi.
Në 2015, Baçi pezullohet si drejtor, kalon zv/drejtor. Asokohe u tha se atij i është kërkuar dorëheqja, por zëdhënësja e Autoritetit të Aviacionit Civil, Eda Gazeli e mohoi duke thënë se Feliks Baçi prej 8 muajsh mbante detyrën e drejtorit të komanduar në Autoritetin e Aviacionit Civil dhe atë të nëndrejtorit, pas dorëheqjes së ish-drejtorit të këtij Autoriteti, Petrit Sulaj.
Çfarë ndodhi sot:
KLSH ka depozituar pranë Prokurorisë së Rrethit Gjyqësor Tiranë, kallëzimin penal nr. 1312/26, date 15.05.2018, respektivisht për z. F.B., në cilësinë e ish-Drejtorit Ekzekutiv të Aviacionit Civil, i cili në mospërmbushje të detyrës së tij funksionale dhe në shkelje të dispozitave ligjore dhe nënligjore në fuqi, ka konsumuar elementët e veprës penale të “Shpërdorimit të detyrës”, dhe “Shkeljes së barazisë në tendera apo ankande publike” parashikuar nga neni 248 dhe 258 i Kodit Penal, pa përjashtuar edhe përgjegjësinë e personave të tjerë punonjës dhe ish-punonjës të Aviacionit Civil të konstatuar nga KLSH apo dhe persona të tjerë të cilët mund të konstatohen si përgjegjës gjatë hetimeve të mëtejshme penale, për shkeljet e trajtuara hollësishëm në Raportin Përfundimtar të Auditimit.
AlpeNews.al
