Zbatimi i ligjit të Vetingut duket se ka prodhuar një tërmet të heshtur në drejtësinë shqiptare. Si asnjëherë më parë, shumica e faqeve të deklaratave të pasurisë së kupolës së drejtësisë shqiptare, janë bosh.
Nuk ka më apartamente të reja, makina të shtrenjta, kredi në shuma të mëdha, transaksione të dyshimta etj. Përkundrazi, me zbatimin e ligjit të Vetingut, ligj i cili deri më tani ka boshatisur Gjykatën Kushtetuese, për të vijuar boshatisjen e gjykatave të tjera, gjyqtarët deklarojnë rrudhje të llogarive bankare, mbyllje biznesesh si dhe para borxh.
Gerd Hoxha
Anëtari i KLD, Gerd Hoxha, njëherësh kryetar i Shoqatës së Gjyqtarëve, deklaron se gjatë vitit 2017 ka blerë një motorr ‘Pieggio’, me vlerë 147 000 lekë. Gjatë vitit 2017, Hoxha deklaron pakësimin e parave në banesë me vlerë 500 000 lekë si dhe pakësimin e një llogarie bankare me vlerë 1 500 euro.
Ndërkaq, anëtari i KLD, Neritan Cena, deklaron se nga borxhi që i ka marrë kunatës së tij, në vlerat 9 mijë euro dhe 5 400 000 lekë kunatës, gjatë vitit 2017, nuk i ka shlyer asnjë lekë. Gjithashtu, Cena deklaron se i ka marrë 2 mijë euro borxh djalit dhe xhaxhait, një hua tjetër 5 mijë euro, ku ka shlyer 1 120 euro, hua 3 988 euro, ku ka shlyer 500 euro si dhe një kredi 700 000 lekë, ku ka shlyer 172 378 lekë. Një pjesë tjetër e anëtarëve të Këshilli të Lartë të Drejtësisë deklarojnë vetëm të ardhurat nga paga dhe interesa nga depozitat bankare.
Gjin Gjoni
Anëtari i KLD, Gjin Gjoni, rezulton se gjatë vitit 2017, ka shituar makinën Benz Mercedez E Clas, në bashkëpronësi me zonjën Elona Çaushi, me vlerë 40 mijë euro. Gjatë vitit 2017, Gjin Gjoni deklaron pagën si gjyqtar 1 383 419 lekë, honorare nga KLD 25 500 lekë, të ardhura nga qeraja 2 300 euro, dy karta krediti 13 mijë euro dhe 10 mijë euro, ndërkohë që vijon të shlyejë një kredi me vlerë 90 mijë euro, marrë që në vitin 2008. Bashkëshortja e tij, Elona Çaushi, gjatë vitit 2017, deklaron overdraft mbi pagën 1 000 000 lekë, overdraft për kartën e kreditit minus 7 315 lekë si dhe një kredi 130 mijë euro.
Zonja Çaushi deklaron disa llogari dhe depozita, me burim nga paga, shpërblime dhe divident nga kompani të ndryshme, konkretisht në vlerat 30 943 470 lekë 10 488 euro, 1 352 472 lekë, 156 778 lekë, 438 814 lekë, 15 mijë euro, 30 mijë euro, 2 466 euro, 47 euro si dhe cash 10 500 euro. Çaushi deklaron mbylljen e aktivitetit të shoqërisë ‘Vintage Second Hand and Neë’, çregjistruar si dhe pezullimin e aktivitetit të shoqërive ‘Best Buy Drug Store’ dhe ‘Bio Gourment’. Elona Çaushi deklaron disa kontrata huaje me vlerat 40 mijë euro, 30 mijë euro, 10 mijë euro, 25 mijë euro dhe 50 mijë euro.
Anëtari me 12 burime të ardhurash
Anëtari i KLD, Vangjel Kosta, gjatë vitit 2017, deklaron 12 burime të ardhurash. Konkretisht Kosta deklaron të ardhura nga kompania ‘ZagaKosta’, nga Shkolla e Magjistraturës, nga Shkolla e Avokatisë, nga KLD, nga shërbime të ‘Alpha Bank’, nga një kontratë shërbimi me TLAS, nga Shoqëria e Hapur Civile, Fonadacioni Slynn Foundation Britani, nga Konrad Adenhauer, nga konsulenca ndaj IFC, si avokat për MEDART, 10 200 euro./Shqiptarja.com
