Ministri i Brendshëm Fatmir Xhafaj ka dalë sot para mediave për të reaguar në lidhje me akuzat e Partisë Demokratike për vëllain e tij Agron Xhafaj.
“Sot PD paketoi mediatikisht si zbulim të ri një çështje të ndodhur në vitin 2002 e cila ka më shumë se 15 vjet që e sjell dhe e risjell në vëmendje. Kjo ndodh sa herë kundërshtarët politikë sulmojnë me baltë kur nuk sulmojnë dot me argumente. Vendimi i gjykatës italiane i ditur dhe njohur online, i publikuar dhe stër publikuar në mediat pranë tyre ka ridalë sot si e vetmja armë kundërshtie ndaj meje si Ministër i Brendshëm, Unë duhet vetëm të ripërsëris veten. Duket e thjeshtë por akoma nuk kam mundur të kuptoj cili është problemi i personalitetit tim si zyrtar me atë çka bën apo çka ka bërë im vëlla. Nuk kuptoj çfarë kërkohet tjetër përveç baltosjes sime kur nuk kam pasur dhe nuk kam asnjë një lloj pushteti për të ndikuar.”
