Presidenti i Turqisë, Reccep Tayyip Erdogan, me partinë e tij AKP, do të organizojë një tubim të madh elektoral në kryeqytetin e Bosnjë dhe Hercegovinës, Sarajevë, raporton BIRN
Gazeta turke pro-qeveritare, Yeni Safak, shkruan që tubimi i Erdogan në kryeqytetin ballkanik do të mbahet në kuadër të fushatës për zgjedhjet e jashtëzakonshme parlamentare dhe presidenciale në Turqi që mbahen më 24 qershor. Tubimi është planifikuar të mbahet më 20 maj.
Kjo gazetë raporton që në Sarajevë do të grumbullohen rreth 10 mijë turq të cilët do të sillen nga shtete të ndryshme të Europës e të Ballkanit. Përveç kësaj, edhe turqit e boshnjakët që jetojnë në Bosnjë do të marrin pjesë në fjalimin e Erdoganit.
Vendimi për të mbajtur një tubim të tillë në Sarajevë erdhi pasi disa shtete europiane nuk lejuan Erdoganin të bënte fushatë në territorin e tyre. Këtu përfshihen Holanda, Gjermani e Austria.
“Fushatat zgjedhore të Turqisë nuk do t’i lejojmë të mbahen në Austri më. Do t’i ndalim të gjitha fushatat dhe aktivitetet që lidhen me politikën turke në vendin tonë”, u ka thënë gazetarëve kryeministri austriak, Sebastian Kurz më 20 prill, vendim që nxiti zemërim nga turqit.
Diaspora turke numëron rreth gjashtë milionë turq dhe kjo ka bërë që të jenë element i rëndësishëm në proceset elektorale turke.
