TIRANE-Ligji për vettingun në polici, gardë republike dhe në shërbimin për çështjet e brendshme dhe ankesat hyri shumë shpejt në zbatim dhe krerët e policisë nuk bënë asnjë punë paraprake me punonjësit për t’i sqaruar ata mbi procedurat që duhet të ndiqen. Kreu i sindikatës së policëve, Sadetin Fishta thotë se merr vazhdimisht ankesa nga policët të cilët nuk po i plotësojnë dot formularët e deklarimit të pasurisë, pastërtisë së figurës e formimit profesional.
Megjithëse kanë mbetur 10 ditë nga afati i dorëzimit të formularëve ende mes policëve ka paqartësi për dokumentet shoqërues, megjithëse nga ministria e brendshme është thënë se ato nuk janë të domosdoshëm dhe se mjaftojnë vetëm formularët deklarativë. Paqartësi kanë për nenin 33 të ligjit të vettingut, i cili i referohet deklarimit të pasurisë.
Sipas ligjit, policit i kërkohen 11 dokumente shoqërues për të ardhurat, shpenzimet, udhëtimet, arsimi i fëmijëve, sendet e paluajtshme etj, të cilat në fund listohen në një inventar. Kontradikta mes ligjit dhe deklaratave të krerëve të ministrisë së brendshme, ka sjellë konfuzion tek punonjësit e policisë. Sipas Fishtës, ata janë nën stres dhe reflektojnë ulje në performancën e punës.
Në këtë situatë kreu i sindikatës së policëve bën apel që formularët të plotësohen me aq dokumente sa policët mund të disponojnë e të dorëzohen brenda afatit ligjor. Në rast se komisionet e vlerësimit do të penalizojnë policët për mungesë dokumentacioni sindikata do I drejtohet gjykatës kushtetuese.
Ndryshe sa tha zv ministri i brendshëm, kreu i sindikatës thotë se problemi me bankat nuk është zgjidhur. Për të marrë vërtetim për të ardhurat punonjësit e policisë deri dje kanë paguar në 500 lekë në një bankë dhe një tarifë prej 1 mijë lekësh në një bankë tjetër.
