Protesta përpara Drejtorisë së Policisë në Tiranë vijon edhe mëngjesin e sotëm. Disa qytetarë ndodhen përpara godinës ku kërkojnë lirimin e 23 të arrestuarve pas protestës së dhunshme në Kukës, kundër tarifës së Rrugës së Kombit.
Protesta në kryeqytet nisi ditën e djeshme rreth orës 19.00, ku dhjetëra qytetarë i bënin thirrje policisë dhe kryeministrit për të liruar të arrestuarit. Tensionet u përshkallëzuan kur qytetarët u futën në godinën e Drejtorisë së Policisë.proteste drejtoria e policise.
Në protestë morën pjesë edhe deputetë të opozitës. Një apel për lirimin e të arrestuarve e bëri dje edhe Këshilli Bashkiak i Kukësit, i cili ka paraqitur një deklaratë me 5 pika ku nuk pranon negociata deri në nxjerrjen e të arrestuarve.
Prokuroria e Kukësit ka lëshuar 23 urdhër arreste për protestuesit, të cilët u përleshën me forcat e rendit dhe i vunë flakën sporteleve të biletave që do të mbledhin taksat për Rrugën e Kombit.
Siç raportoi ‘BalkanWeb’, parmbrëmë, forcat e policisë kanë mësyrë në banesat e personave që kanë qenë pjesë e protestës, dhe kanë arrestuar disa prej tyre. Familjarët e të arrestuarve u mblodhën mëngjesin e sotëm para Komisariatit të Policisë së Kukësit, duke kërkuar sqarime për të afërmit e tyre.
