Detaje të reja bëhen me dije lidhur me plagosjen me armë zjarri të ndodhur mbrëmjen e djeshme në Tiranë, ku mbeti i lënduar në këmbë 34-vjçari Bledar Brinja.
Dyshimet e Policisë pas marrjes në pyetje të Brinjës janë se plagosja e tij ka ndodhur për konflikte të vjetra që 34-vjeçari kishte me personin e shpallur në kërkim për ngjarjen: T.A., 37 vjeç, banues në Tiranë.
34-vjeçari tha se u qëllua nga dy persona me motor teksa ndodhej nën drejtimin e makinës tip “Volkswagen” i vetëm.
Ngjarja ka ndodhur rreth orës 21:25, në rrugën “Teodor Keko”. Policia njoftoi dje se edhe pse i plagosur, 34-vjeçari me banim në Kamzë arriti të shkonte në spital me makinën e tij.
Sot, Policia bëri me dije se pas mjekimit në spital, Brinja u largua për në banesë.
Ndaj T.A. rëndojnë akuzat për veprat penale “Vrasje me paramendim” kryer në bashkëpunim, mbetur në tentative, “Prodhim e mbajtje pa leje e armeve luftarake dhe e municion” parashikuar nga nenet 78-22-25 dhe 278/2 të Kodit Penal. Ndërkaq, dosja hetimore i ka kaluar Prokurorisë së Tiranës për hetime të mëtejshme.
