Në orët e para të ditës së sotme një automjet tip “Benz” u hidh në erë, pas një shpërthimi me tritol në qytetin e Shkodrës.
Ngjarja ndodhi në lagjen “Perash” dhe fatmirësisht nga shpërthimi nuk pati të lënduar në njerëz, por vetëm dëme materiale, kryesisht në pjesën e përparme të makinës, ku ishte vendosur edhe eksplozivi.
Sipas të dhënave të deritanishme, automjeti tip ‘Benz’ me targa AA655MK, i përket Admir Lishit 40 vjeç, i cili njihet edhe si shefi i financës në policinë kufitare.
Pas ngjarjes, zyrtari i policisë kufitare në Shkodër është marrë në pyetje dhe kanë nisur hetimet për ndonjë konflikt të mundshëm.
40-vjeçari ka deklaruar se nuk është i përfshirë në një konflikt, ndërsa në këto kushte policia nuk përjashton edhe mundësinë që autorët të kenë ngatërruar shënjestër.
Policia vijon hetimet për identifikimin dhe kapjen e autorëve, si dhe zbardhjen e rrethanave të ngjarjes, raporton Politiko.al.
