Një 56-vjeçar nga fshati Spathar i Njësisë Administrative Qendër në Bashkinë e Librazhdit rezulton i zhdukur prej 24 orësh. Shtetasi Ali Tota, i cili ushtronte zanatin e ustait, punonte privatisht në zona të ndryshme të Librazhdit. Po që të shtunën rreth orës 16.00, ai ka humbur kontaktet me familjarët.
Sipas denoncimit të tyre, Ali Tota ka qenë duke u kthyer nga puna dhe në rrethana të paqarta rezulton i zhdukur pa asnjë gjurmë.
Paraprakisht familjarët e 56-vjeçarit dyshojnë për mbytje aksidentale të tij në rrjedhën e rrëmbyeshme të përroit të fshatit Spathar ku ai kalonte për të shkuar në shtëpinë e tij.
Disa banorë kanë raportuar se dyshojnë të kenë parë një kufomë në rrjedhën e lumit Shkumbin në vendin e quajtur “Ura e Çotës”.
Sakaq, pas denoncimit të bërë në komisariatin e policisë Librazhd pasditen e të dielës është bërë shpallja i zhdukur i 56-vjeçarit Ali Tota. Policia dhe banorë të Librazhdit kanë filluar krehjen e zonës dhe rrjedhës së lumit Shkumbin nga Ura Pasarelë e fshatit Spathar deri në afërsi të Elbasanit, dhe u është kërkuar informacion qytetarëve për çdo detaj që mund të kenë rreth vendit dhe kohës kur është parë prej tyre për herë të fundit 56-vjeçari Ali Tota.
